حجامہ : دور حاضر میں مقبول طریقہ علاج

حجامہ دنیا میں تیزی سے مقبول ہوتا ہوا اسلامی طریقہ علاج ہے، جسے مغربی ممالک اور غیر اسلامی ممالک میں cupping therapy کے نام سے جانا جاتا ہے۔ '' حجامہ عربی زبان کے لفظ حجم سے نکلا ہے‘‘ جس کے معنی کھینچنا/چوسنا ہے۔ اِس عمل میں مختلف حصوں کی کھال سے تھوڑا سا خون نکالا جاتا ہے۔ انسانی صحت کا دارو مدار جسمانی خون پر ہے۔ اگر خون صحیح ہے تو انسان صحت مند ہے، ورنہ مختلف بیماریوں کا شکار ہو جاتا ہے۔ بیماریاں اس فاسد خون کے ساتھ نکل جاتی ہیں۔ حجامہ ایک قدیم علاج ہے اور ہمارے پیارے نبی حضرت محمد صلی اللہ علیہ وآلہ وسلم کا تجویز کردہ ہے۔ اِس قدیم طریقہ علاج میں جسم کے 143 مقامات سے فاسد خون نکال کر مختلف بیماریوں کا علاج کیا جاتا ہے۔ حضرت محمد صلی اللہ علیہ وآلہ وسلم نے حجامہ لگانے کو افضل عمل قرار دیا ہے۔ حضرت ابن عباس رضی اللہ عنہ فرماتے ہیں کہ رسولؐ اللہ نے فرمایا ''اچھا ہے وہ بندہ جو پچھنے لگاتا ہے۔ خون نکال دیتا ہے۔ کمر ہلکی کر دیتا ہے اور بینائی کو جلاء بخشتا ہے‘‘۔ (سنن ابن ماجہ) ۔ 

جدید میڈیکل سائنس اب تیزی سے حجامہ کی جانب متوجہ ہو رہی ہے۔ مغربی سائنس دان اور تحقیقاتی ادارے حجامہ پر مسلسل تحقیق میں مصروف ہیں، ان تمام تحقیقات کی بنیاد قدیم ترین طبی کتاب'' ایبرس پیپیرس‘‘ ہے۔ سائنس دان اس امر پر بھی حیران ہیں کہ ہزاروں سال قبل انسان نے میڈیکل کی اِس قدر پیچیدہ گتھی کس طرح سلجھائی تھی۔ حجامہ سے بلڈ پریشر، ٹینشن، جوڑوں کا درد، پٹھوں کا درد، کمر کا درد، ہڈیوں کا درد، سر کا درد (درد شقیقہ) مائیگرین، یرقان، دمہ، قبض، بواسیر، فالج، موٹاپا، کولیسٹرول، مرگی، گنجاپن، الرجی، عرق النساء وغیرہ اور اس کے علاوہ 70 سے زائد روحانی وجسمانی دونوں بیماریوں کا علاج کیا جاتا ہے۔ یہ خون صاف کرتا ہے اور حرام مغز کو فعال کرتا ہے، شریانوں پر اچھا اثر ہوتا ہے، پٹھوں کا اکڑائو ختم کرتا ہے، دمہ اور پھیپھڑوں کے امراض اور انجائنا کے لیے مفید ہے، آنکھوں کی بیماریوں کو بھی ختم کرتا ہے، گٹھیا عرق النساء اور نقرس کے درد کو ختم کرتا ہے، فشار خون میں آرام دیتا ہے، زہر خورانی میں مفید ہے، مواد بھرے زخموں کے لیے فائدہ مند ہے۔

جسم کے کسی حصے میں درد کو فوری ختم کرتا ہے۔ حجامہ لگوانے کے لیے مستند اور تجربہ کار تھیراپسٹ کا انتخاب ضروری ہے کیوں کہ ناتجربہ کار شخص صحیح حجامہ نہیں لگا سکتا جس وجہ سے علاج نہیں ہو پاتا اور مریض مایوس ہو جاتا ہے یہاں یہ بات بھی ذہن نشین رہنی چاہئے کہ یہ طریقہ علاج کسی طرح مریض کیلئے تکلیف دہ نہیں ہے اور حجامہ یعنی کپنگ تھیراپی کا کو ئی سائیڈ افیکٹ بھی نہیں ہے۔ چونکہ حجامہ میں کپ لگانے سے پہلے کپ لگائے جانے والے مقام پر ہلکی ہلکی خراشیں لگائی جاتی ہیں تاکہ وہاں سے خون کے قطرے باہر آسکیں اس لئے عام طور پر لوگ سمجھتے ہیں کہ یہ ایک تکلیف دہ عمل ہو گا۔ جبکہ حقیقت میں ایسا بالکل نہیں ہے حجامہ عام طور پر پشت پر کیا جاتا ہے یہ دس سے پندرہ منٹ کا عمل ہوتا ہے اور مریض کو اس وقت حیرت ہوتی ہے، جب اسے پتا چلتا ہے کہ یہ عمل مکمل ہو چکا ہے اور اسے کوئی تکلیف بھی نہیں ہوئی۔ چونکہ حجامہ ایک مکمل طریقہ علاج ہے اس لئے اس میں اس طرح کے سخت پرہیز نہیں کرنے پڑتے جو کہ عام طور پر ایلوپیتھک، ہومیو پیتھک، یونانی یا دیگر علاج کے طریقوں میں کئے جاتے ہیں۔ 

تاہم مکمل علاج کے لئے مریض کو سختی سے طب نبویؐ میں دی گئی ہدایت کی پابندی کرنی چاہئے۔ یہاں یہ امر گوش گزار کر دینا ضروری ہے کہ حجامہ مسلمانوں کی ایجاد نہیں ہے، لیکن مسلمانوں نے اس کو اختیار کیا۔ حجامہ کی تاریخ اور حجامہ سے علاج کا طریقہ 3000 سال قبل مسیح سے بھی پرانا ہے۔ اس طریقہ علاج کا ذکر Ebers Papyrus نامی کتاب میں بھی ہے جو 1550 قبل مسیح کی مشہور طبی کتاب ہے۔ حجامہ ہزاروں سال پرانا طریقہ علاج ہونے کی وجہ سے اس میں ہزاروں سال کے تجربات بھی شامل ہیں۔ حجامہ کی وجہ سے جسم کا دوران خون ( of Blood Circulation) بہتر ہو جاتا ہے۔ 

٭حجامہ Lymphatic system , Vascular system, Arteries کی صفائی کرتا اور Capillaries کو فعال بناتا ہے۔ 

٭حجامہ کولیسٹرول لیول کو Maintain کرتا ہے، یعنی LDL ( خراب چربی) کو کم کرتا ہے اور HDL ( فائدہ مند چربی) کو بڑھاتا ہے۔ 

٭ جسم کے نازک و اہم بڑی شریانوں (Arteries) کی صفائی کرتا اور فعال کر کے شریانوں کی صلابت Arteriosclerosis/ Atherosclerosis کو کم کرتا ہے۔

٭حجامہ جسم کی قوت مدافعت کو بھی تقویت دیتا ہے جس سے بیماریوں سے لڑنے کی طاقت میں اضافہ ہوتا ہے۔ 

٭ نفسیاتی امراض جیسے دماغی تنائو، ذہنی دبائو، گھبراہٹ اور بے چینی جیسے نفسیاتی امراض میں کافی مفید ہے 

٭ حجامہ حسن کی افزائش میں مدد گار ہے۔

٭حجامہ جسم کے Tissues سے زہریلے اور فاسد مادوں کے اخراج میں مدد کرتا ہے۔ 

٭حجامہ دماغ، اعصاب، یادداشت اور حسی اعضاء، آنکھ کان اور ناک کو طاقت دیتا ہے۔ 

٭ پھوڑے، پھنسیاں اور زخم وغیرہ سے مضر صحت مواد کو نکالنے میں مدد کرتا ہے۔

حکیم نازش احتشام اعظمی